ಭಾರತ್ ಬಯೋಟೆಕ್‌ನ ಕೋವಾಕ್ಸಿನ್ ಬೂಸ್ಟರ್ ಡೋಸ್ ಓಮಿಕ್ರಾನ್, ಡೆಲ್ಟಾ ವಿರುದ್ಧ 100% ಪರಿಣಾಮಕಾರಿ: ಅಧ್ಯಯನ ವರದಿ

ಹೊಸದಿಲ್ಲಿ: ಭಾರತ್ ಬಯೋಟೆಕ್ ಕೊವಾಕ್ಸಿನ್‌ನ ಬೂಸ್ಟರ್ ಡೋಸ್ ವೈರಸ್‌ನ ಓಮಿಕ್ರಾನ್ ಮತ್ತು ಡೆಲ್ಟಾ ಎರಡೂ ರೂಪಾಂತರಗಳನ್ನು ತಟಸ್ಥಗೊಳಿಸುವಲ್ಲಿ ಪರಿಣಾಮಕಾರಿ ಎಂದು ಸಾಬೀತಾಗಿದೆ.

ಅಧಿಕೃತ ಟ್ವಿಟರ್ ಹ್ಯಾಂಡಲ್ ಮೂಲಕ ಮಾಹಿತಿ ನೀಡಿದ ಭಾರತ್ ಬಯೋಟೆಕ್, ಕೋವಾಕ್ಸಿನ್‌ನ ಬೂಸ್ಟರ್ ಶಾಟ್ ಲೈವ್ ವೈರಸ್ ನ್ಯೂಟ್ರಲೈಸೇಶನ್ ಅಸ್ಸೇ ಬಳಸಿ ಓಮಿಕ್ರಾನ್ (ಬಿ.1.529) ಮತ್ತು ಡೆಲ್ಟಾ (ಬಿ.1.617.2) ಎರಡರ ವಿರುದ್ಧವೂ ದೃಢವಾದ ತಟಸ್ಥಗೊಳಿಸುವ ಪ್ರತಿಕಾಯ ಪ್ರತಿಕ್ರಿಯೆಗಳನ್ನು ಸೃಷ್ಟಿಸಿದೆ ಎಂದು ಹೇಳಿದೆ.

ಲಸಿಕೆ ತಯಾರಕ ಸಂಸ್ಥೆಯ ಅಧ್ಯಯನದಲ್ಲಿ 100% ಪರೀಕ್ಷಾ ಸೀರಮ್ ಮಾದರಿಗಳು ಡೆಲ್ಟಾ ರೂಪಾಂತರದ ವೈರಸ್‌ಗಳನ್ನು ತಟಸ್ಥಗೊಳಿಸಿರುವುದು ಸಾಬೀತಾಗಿದೆ. ಮತ್ತು 90% ಕ್ಕಿಂತ ಹೆಚ್ಚು ಸೀರಮ್ ಮಾದರಿಗಳು ಓಮಿಕ್ರಾನ್ ರೂಪಾಂತರದ ತಟಸ್ಥೀಕರಣವನ್ನು ತೋರಿಸಿದೆ ಎಂದು ಭಾರತ್‌ ಬಯೋಟೆಕ್‌ ಪ್ರಕಟಣೆ ತಿಳಿಸಿದೆ.

ಎಮೋರಿ ವಿಶ್ವವಿದ್ಯಾನಿಲಯವು ಈ ಲಸಿಕೆಯ ಸಾಮರ್ಥ್ಯದ ಬಗ್ಗೆ  ಸಂಶೋಧನೆಗಳನ್ನು ನಡೆಸಿದೆ. ಎರಡು-ಡೋಸ್ BBV152 ವ್ಯಾಕ್ಸಿನೇಷನ್ ಸರಣಿಯ ಆರು ತಿಂಗಳ ನಂತರ ಕೋಶ-ಮಧ್ಯಸ್ಥ ರೋಗನಿರೋಧಕ ಶಕ್ತಿ ಮತ್ತು ಹೋಮೋಲೋಗಸ್ (D614G) ಮತ್ತು ಹೆಟೆರೊಲಾಜಸ್ ಸ್ಟ್ರೈನ್ (ಆಲ್ಫಾ, ಬೀಟಾ, ಡೆಲ್ಟಾ ಮತ್ತು ಡೆಲ್ಟಾ ಪ್ಲಸ್) ಎರಡಕ್ಕೂ ಪ್ರತಿಕಾಯಗಳನ್ನು ಬಲಗೊಳಿಸುತ್ತದೆ ಮತ್ತು ವೈರಸ್‌ ರೂಪಾಂತರಗಳ ಶಕ್ತಿಯನ್ನು ಅಂದಾಜಿಸಿದ್ದಕ್ಕಿಂತಲೂ ಹೆಚ್ಚಿನ ಪ್ರಮಾಣದಲ್ಲಿ ಕುಂದಿಸುತ್ತದೆ ಎಂಬುದನ್ನು  ಅಧ್ಯಯನವು ತೋರಿಸುತ್ತದೆ.

COVAXIN® (BBV152) Booster Shown to Neutralize Both Omicron and Delta Variants of SARS-CoV-2#bbv152 #COVAXIN #BharatBiotech #COVID19Vaccine #omicron #deltavariant #SARS_CoV_2 #covaxinapproval #boosterdose #pandemic pic.twitter.com/0IgFmm13rS

— BharatBiotech (@BharatBiotech) January 12, 2022

ಎಮೋರಿ ಲಸಿಕೆ ಕೇಂದ್ರದ ಸಹಾಯಕ ಪ್ರಾಧ್ಯಾಪಕ ಮೆಹುಲ್ ಸುತಾರ್, (ಪಿಎಚ್‌ಡಿ) ಅಧ್ಯಯನದ ಕುರಿತು ಮಾತನಾಡುತ್ತಾ, “ಈ ಪ್ರಾಥಮಿಕ ವಿಶ್ಲೇಷಣೆಯ ಡೇಟಾವು ಕೋವಾಕ್ಸಿನ್‌ನ ಬೂಸ್ಟರ್ ಡೋಸ್ ಅನ್ನು ಪಡೆಯುವ  ವ್ಯಕ್ತಿಗಳು ಒಮಿಕ್ರಾನ್ ಮತ್ತು ಡೆಲ್ಟಾ ರೂಪಾಂತರಗಳಿಗೆ ಗಮನಾರ್ಹ ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಹೊಂದಿದ್ದಾರೆಂದು ತೋರಿಸುತ್ತದೆ. ಬೂಸ್ಟರ್ ಡೋಸ್ ಕಾಯಿಲೆಯ ತೀವ್ರತೆ ಮತ್ತು ಆಸ್ಪತ್ರೆಗೆ ದಾಖಲಾಗುವುದನ್ನು ಕಡಿಮೆ ಮಾಡುವ ಸಾಮರ್ಥ್ಯವನ್ನು ಹೊಂದಿದೆ ಎಂದು ಸಂಶೋಧನೆಗಳು ಸೂಚಿಸುತ್ತವೆ' ಎಂದು ತಿಳಿಸಿದರು.

ಭಾರತ್ ಬಯೋಟೆಕ್‌ನ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಡಾ. ಕೃಷ್ಣ ಎಲಾ ಮಾತನಾಡಿ, “ನಾವು ಕೋವಾಕ್ಸಿನ್‌ಗಾಗಿ ನಿರಂತರ ಆವಿಷ್ಕಾರ ಮತ್ತು ಉತ್ಪನ್ನ ಅಭಿವೃದ್ಧಿ ನಡೆಸುತ್ತಿದ್ದೇವೆ. ಓಮಿಕ್ರಾನ್ ಮತ್ತು ಡೆಲ್ಟಾ ರೂಪಾಂತರಗಳ ವಿರುದ್ಧ ಧನಾತ್ಮಕ ನ್ಯೂಟ್ರಲೈಸೇಶನ್ ಪ್ರತಿಕ್ರಿಯೆಗಳು ಹ್ಯೂಮರಲ್ ಮತ್ತು ಸೆಲ್-ಮಧ್ಯಸ್ಥ ಪ್ರತಿರಕ್ಷಣಾ ಪ್ರತಿಕ್ರಿಯೆಗಳನ್ನು ಉತ್ಪಾದಿಸುವ ಬಹು-ಎಪಿಟೋಪ್ ಲಸಿಕೆಯು ನಮ್ಮ ಊಹೆಯನ್ನು ದೃಢೀಕರಿಸುತ್ತವೆ' ಎಂದರು.

ವಯಸ್ಕರು ಮತ್ತು ಮಕ್ಕಳಿಗೆ ಸಾರ್ವತ್ರಿಕ ಲಸಿಕೆಯಾಗಿ ಕೋವಾಕ್ಸಿನ್ ಅನ್ನು ಬಳಸುವುದರೊಂದಿಗೆ ಕೋವಿಡ್-19 ವಿರುದ್ಧ ಜಾಗತಿಕ ಲಸಿಕೆಯನ್ನು ಅಭಿವೃದ್ಧಿಪಡಿಸುವ ಭಾರತ್ ಬಯೋಟೆಕ್‌ನ ಗುರಿಯನ್ನು ಸಾಧಿಸಲಾಗಿದೆ ಎಂದು ಅವರು ಹೇಳಿದರು.

ಭಾರತದ ಕೋವಿಡ್‌-19 ಲಸಿಕೆ ಅಭಿಯಾನದಲ್ಲಿ ಬಳಸಲಾಗುವ ಪ್ರಾಥಮಿಕ ಲಸಿಕೆಗಳಲ್ಲಿ ಕೋವಿಶೀಲ್ಡ್‌  ಮತ್ತು ಕೋವ್ಯಾಕ್ಸಿನ್‌ ಸೇರಿವೆ. ಕೋವಾಕ್ಸಿನ್ ಅನ್ನು ಹೈದರಾಬಾದ್ ಮೂಲದ ಜೈವಿಕ ತಂತ್ರಜ್ಞಾನ ಕಂಪನಿಯಾದ ಭಾರತ್ ಬಯೋಟೆಕ್ ಅಭಿವೃದ್ಧಿಪಡಿಸಿದೆ. ಏತನ್ಮಧ್ಯೆ, ಭಾರತವು ಜನವರಿ 10 ರಿಂದ ಆರೋಗ್ಯ ಮತ್ತು ಮುಂಚೂಣಿಯ ಕೆಲಸಗಾರರಿಗೆ ಮತ್ತು 60 ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಜನರಿಗೆ ಕೋವಿಡ್ -19 ಲಸಿಕೆಯ ಬೂಸ್ಟರ್ ಅಥವಾ “ಮುನ್ನೆಚ್ಚರಿಕೆಯ ಡೋಸ್” ಅನ್ನು ನೀಡಲು ಪ್ರಾರಂಭಿಸಿದೆ.

ಉಪಯುಕ್ತ ನ್ಯೂಸ್ ಕುಟುಂಬ ಸೇರಲು ಇಲ್ಲಿ ಕ್ಲಿಕ್ಕಿಸಿ

ಉಪಯುಕ್ತ ನ್ಯೂಸ್‌’ ಫೇಸ್‌ಬುಕ್ ಪುಟ ಲೈಕ್ ಮಾಡಿ

ಉಪಯುಕ್ತ ನ್ಯೂಸ್‌ ವಾಟ್ಸಪ್‌ ಗ್ರೂಪಿಗೆ ಸೇರಲು ಈ ಲಿಂಕ್ ಕ್ಲಿಕ್ ಮಾಡಿ